*ദാനംചെയ്തത് 2645 ലിറ്റർ മുലപ്പാൽ;ഗിന്നസ് റെക്കോഡ് തിരുത്തി 36-കാരി, രക്ഷിച്ചത് 3.5 ലക്ഷം കുഞ്ഞുങ്ങളെ*

മുലപ്പാൽ ദാനത്തിൽ സ്വന്തം ഗിന്നസ് റെക്കോർഡ് തിരുത്തിക്കുറിച്ച് യു.എസിലെ ടെക്സാസ് സ്വദേശിനി അലീസ് ഒഗിൾട്രീ. 2,645.58 ലിറ്റർ മുലപ്പാലാണ് ഇവർ ദാനംചെയ്തത്. 2014-ലെ 1,569.79 ലിറ്റർ എന്ന സ്വന്തം റെക്കോർഡാണ് 36-കാരിയായ അലീസ് തിരുത്തിയത്.

ഒരു ലിറ്റർ മുലപ്പാൽകൊണ്ട് മാസം തികയാത്ത 11 കുഞ്ഞുങ്ങളുടെ ജീവൻ നിലനിർത്താൻ കഴിയുമെന്നാണ് നോർത്ത് ടെക്സാസിലെ മദേഴ്സ് മിൽക് ബാങ്കിന്റെ കണക്ക്. ഇതുപ്രകാരം മൂന്നരലക്ഷത്തിലേറെ കുഞ്ഞുങ്ങൾക്ക് അലീസ് മുലയൂട്ടിയിട്ടുണ്ടാവാമെന്നാണ് കണക്കാക്കപ്പെടുന്നത്.

ആളുകളെ സഹായിക്കണമെന്ന് തനിക്ക് ആഗ്രഹമുണ്ടായിരുന്നു. എന്നാൽ, പണക്കാരിയല്ലാത്തതിനാൽ അതിന് സാധിച്ചിരുന്നില്ല. മുലപ്പാൽ ദാനംചെയ്യുന്നത് മാത്രമാണ് തനിക്ക് സാധിക്കുമായിരുന്നതെന്നും ഗിന്നസ് വേൾഡ് റെക്കോർഡ്സ് വെബ്സൈറ്റിന് നൽകിയ അഭിമുഖത്തിൽ അലീസ് വ്യക്തമാക്കി.

മകൻ കെയ്ലിക്ക് ജന്മം നൽകിയതുമുതൽ അലീസ് മുലപ്പാൽ ദാനംചെയ്യുന്നുണ്ട്. 2010-ൽ ജനിച്ച മകനിപ്പോൾ 14 വയസായി. സാധാരണയിൽ കൂടുതലായി മുലപ്പാൽ ഉത്പാദിപ്പിക്കുന്നുണ്ടെന്ന് കണ്ടെത്തിയതിനെത്തുടർന്ന് ഒരു നഴ്സാണ് ദാനംചെയ്യാൻ അലീസിനോട് നിർദേശിക്കുന്നത്. കെയ്ലിക്ക് പിന്നാലെ കെയ്ജ് (12), കോറി (7) എന്നീ ആൺകുട്ടികൾക്കും അലീസ് ജന്മംനൽകി. അപ്പോഴും മുലപ്പാൽ ദാനംചെയ്യുന്നത് തുടർന്നു. ഇപ്പോൾ അലീസിന് നാലുമക്കളാണുള്ളത്