പഠിച്ച കലാലയത്തിൽ തന്നെ മോഷണശ്രമം; മഹാരാജാസ് ഹോസ്റ്റലിൽ നിന്ന് കട്ടിലുകൾ കടത്താൻ ശ്രമിച്ച പൂർവ വിദ്യാർഥി അറസ്റ്റിൽ

ഒരിക്കൽ വിദ്യാർത്ഥിയായി സ്വപ്നങ്ങൾ നെയ്ത കലാലയത്തിലേക്ക്, വർഷങ്ങൾക്കിപ്പുറം മടങ്ങിയെത്തിയത് ഓർമകൾ തേടാനല്ല, ഹോസ്റ്റലിലെ കട്ടിലുകൾ കടത്താനായിരുന്നു. എറണാകുളത്തെ മഹാരാജാസ് കോളജ് ഹോസ്റ്റലിൽ നിന്ന് എട്ട് കട്ടിലുകൾ കടത്താൻ ശ്രമിച്ച പൂർവ വിദ്യാർഥി ആൻസ്റ്റനെ പൊലീസ് അറസ്റ്റ് ചെയ്തു.

ഞായറാഴ്ച പുലർച്ചെയായിരുന്നു സംഭവം. ഹോസ്റ്റലിൽ സൂക്ഷിച്ചിരുന്ന എട്ട് കട്ടിലുകൾ വാഹനത്തിലേക്ക് കയറ്റാൻ ശ്രമിക്കുന്നതിനിടെയാണ് ഹോസ്റ്റൽ വാർഡന്റെ ശ്രദ്ധയിൽ ഇയാൾപ്പെടുന്നത്.

കട്ടിലുകൾ എന്തിനാണ് കൊണ്ടുപോകുന്നതെന്ന് ചോദിച്ചപ്പോൾ, “മൂട്ട ശല്യം ഒഴിവാക്കാൻ കെമിക്കൽ അടിക്കാൻ കൊണ്ടുപോകുകയാണ്” എന്നായിരുന്നു ഇയാളുടെ മറുപടി. എന്നാൽ ഇതിനായി ആരാണ് ചുമതലപ്പെടുത്തിയതെന്ന ചോദ്യത്തിന് വ്യക്തമായ മറുപടി നൽകാൻ കഴിയാതെ വന്നതോടെ വാർഡന് സംശയം തോന്നി.

തുടർന്ന് കോളജ് അധികൃതർ പൊലീസിനെ വിവരമറിയിക്കുകയായിരുന്നു. സ്ഥലത്തെത്തിയ പൊലീസ് പ്രതിയെ കസ്റ്റഡിയിലെടുത്ത് അറസ്റ്റ് ചെയ്തു.

ഇയാൾ മുമ്പും സമാനരീതിയിൽ ഹോസ്റ്റലിൽ നിന്ന് കട്ടിലുകളോ മറ്റ് സാധനങ്ങളോ കടത്തിയിട്ടുണ്ടോയെന്ന് അന്വേഷിക്കണമെന്നാവശ്യപ്പെട്ട് കോളജ് അധികൃതർ പരാതി നൽകിയിട്ടുണ്ട്. സംഭവത്തിൽ പൊലീസ് കേസെടുത്ത് അന്വേഷണം തുടരുകയാണ്.

ഒരുകാലത്ത് വിദ്യാർത്ഥി ജീവിതത്തിന്റെ ഓർമകൾ സമ്മാനിച്ച ഹോസ്റ്റലിൽ നിന്നുള്ള ഈ സംഭവം, വിദ്യാഭ്യാസ സ്ഥാപനങ്ങളുടെ സ്വത്തുക്കൾ സംരക്ഷിക്കുന്നതിന്റെ ആവശ്യകത വീണ്ടും ഓർമ്മപ്പെടുത്തുന്നതായി മാറുകയാണ്..